मेलबर्न। काठमाडौंको पेप्सीकोलामा दाइहरुले बनाएको कोर्टमा पहिलो पटक खेल्दा सुमित थापालाई कुनै दिन अष्ट्रेलियामा प्रतिष्ठित लिगमा खेल्नेछु भन्ने लागेको थिएन। १४ वर्षको उमेरदेखि बास्केटबल खेल्न थालेका ती सुमित अहिले अष्ट्रेलियावासी नेपाली समुदायका लागि गर्व बनिरहेका छन्। थापा मेलबर्नको प्रतिष्ठित लिग (एमबीएल लिग) मा फाइनलसम्म पुग्ने पहिलो नेपाली बनेका छन्। यसलाई आफ्नो ठूलो उपलब्धि नठान्ने उनको सपना छ, फाइनलमा जितेर गोल्ड मेडल सहित नेपाल जाने।
नेपालमा खेल्न सुरु गर्दाका ती दिन सम्झिँदै सुमित भन्छन्,"हाम्रो टोलका आदरणीय दाइहरु व्यापक थापा, सविन थापा, राधेश्याम थापा, प्रकाश थापा, विकेश के सी, राज थापाले खाली ठाउँको उपयोग गर्दै बास्केटबल कोर्ट बनाउनुभयो। त्यसपछि त्यहाँ साथीहरुसंग खेल्दा खेल्दै मलाई बास्केटबल खेल्ने रुची जागेको हो। यदि दाइहरुले त्यो खाली जग्गालाई त्यसरी उपयोग नगर्नुभएको भए, सायद म आज यो ठाउँमा हुन्नथें होला। दाइहरुको त्यो काम, खेल्नका लागि हामीलाई दिनुभएको प्रेरणाले मलाई अहिले पनि हौसला मिल्छ "।
पेप्सीकोलाको सानो कोर्ट हुँदै सुमित विद्यालय स्तरीय, क्षेत्र स्तरिय प्रतियोगितामा खेल्न थाले। २०१२/१३ मा उनले भारतमा समेत खेल्ने अवसर पाए। खेल प्रतियोगिताको आकारसंगै उनको सपनाको आकार पनि बढिरहेको थियो। विकसित देशमा हुने ठूला प्रतियोगिता टेलिभिजनमा देख्दा उनका आँखा ती ठूला प्रतियोगितामा आफू खेलिरहेको दृश्य छाउँथ्यो।
यसैबीच सुमित थापा २०१५ मा अष्ट्रेलिया आए। साहसी, मेहनती र दृढ स्वभावका उनले अष्ट्रेलियामा पनि आफ्नो सपनालाई पछ्याए। यहाँ आएर उनले बास्केटबल खेल यात्राको अगाडीको बाटो खन्न थाले। सुरुमा उनी साना-साना प्रतियोगिता खेल्ने गर्थे, उनलाई थाहा थियो, माथि चढ्नका लागि उनले आधार बनाउनु छ। साना-साना प्रतियोगितामा खेल्दै गर्दा उनी बास्केटबल खेलाडी तथा खेलप्रेमीहरुको नजरमा पर्न थाले।
त्यसपछि सुमितले २०१७ मा भिक्टोरियन लिगमा रेभिन्सबाट खेल्ने अवसर पाए। त्यसपछि २०१९ मा ब्ल्याकबर्न ग्रिफिन्सबाट खेल्न थाले। टिमको क्याप्टेन बनेका सुमितले सेमीफाइनलमा हार व्यहोर्नुपर्यो, तर उनको मेहनत र नेतृत्वदायीदायी क्षमताका कारण २०२०/२०२१ मा क्यापटेन अफ द इयर बन्न सफल भए। आफ्नो क्षमता, मेहनत र त्यो हारबाट सिकेको अनुभवलाई उपयोग गर्दै सुमित यो वर्ष फाइनलमा प्रवेश गरेका छन्। फाइनल खेल आगामी अप्रिल १०, आइतबार दिउँसो २:४५ देखि सुरु हुनेछ। रभिल्ले स्टेडियम, कोर्ट १ मा हुने उनको खेल रेडब्याक्स विरुद्ध हुनेछ।
अबको योजना के छ त भन्ने हाम्रो प्रश्नमा सुमित भन्छन्, "अहिले तत्काल भन्नुपर्दा, फाइनलमा जितेर गोल्ड मेडल लिएर नेपाल जाने पहिलो सपना हो। र, त्यहाँ गएर आफू खेलेको बास्केटबल कोर्टलाई अझ राम्रो बनाउनुपर्छ। दिर्घकालिन योजना भन्नुहुन्छ भने, नेपाल फर्केर बास्केटबल एकेडेमी खोल्न चाहन्छु, त्यहाँबाट राम्रा खेलाडी र उनीहरुका लागि राम्रो अवसर सिर्जना गर्न चाहन्छु। देश र मेहनत सानो कहिल्यै पनि हुँदैन। मेहनत गर्दा सकिने रहेछ भन्ने म आफै उदाहरण बनेको छु। अब युवाहरु पैसा कमाउन मात्र विदेश जाँदैनन् भन्ने उदाहरण बन्नु छ "।
सुमितले आफूले खेलेको पेप्सीकोलाको बास्केटबल कोर्टको जिर्णोद्दार गरेका छन्। अब गोल्ड मेडल जित्ने पहिलो सपना पूरा गरेर त्यो बास्केटबल कोर्टलाई अझै राम्रो बनाउने सपना पूरा गर्न उनी आतुर छन्।
-1723260540.jpeg)
-1722510781.jpg)
