मेलबर्न। विभिन्न सामुदायिक संस्था, क्लबहरुमा नेतृत्व तहको जिम्मेवारी सम्हाल्दै अष्ट्रेलियाको भिक्टोरियावासी नेपाली समुदायलाई अगाडी बढाउन क्रियाशील मध्ये एउटा नाम हो, तारा गैरे। तारा गैरे भिक्टोरियाको मल्टिकल्चरल कमिसनमा रिजनल एडभाइजरी काउन्सिल सदस्य हुनुहुन्छ। नेपलीज एसोसिएसन अफ भिक्टोरिया (न्याभ) को भूतपूर्व अध्यक्ष समेत रहनुभएका गैरेसंग आज हामीले नेपाल फेस्टिवल मेलबर्न २०२२ विशेष कुराकानी गरेका छौं। नेपाल फेस्टिवल मेलबर्नका लागि उहाँले परेड व्यवस्थापन समितिको नेतृत्व सम्हाल्दै आउनुभएको छ।
नेपाल फेस्टिबलको आयोजक समितिमा रहेर काम गरिरहनुभएको छ, तयारी कस्तो भइरहेको छ ?
तयारी राम्रो भइरहेको छ। नेपाल फेस्टिवलका लागि अब त केही दिन मात्र बाँकी छ। सबै कमिटिहरुले आफ्नो जिम्मेवारी अनुसार काम गरिरहनुभएको छ। कोभिडका कारण चार वर्ष पछि आयोजना हुँदै गरेकाले अझ बढी सहभागितामूलक बनाउने प्रयास गरिएको छ। त्यसैअनुसार विभिन्न कामका लागि समिति, उपसमिति छुट्टाइएको छ। कामहरु अब करिब अन्तिम चरणमा पुगेको छ। समग्रमा भन्नुपर्दा सोचेअनुसार नै काम भइराखेको छ।
नेपाल फेस्टिवलका बारेमा तपाईंको धारणा के छ ?
मेरो विचारमा, यो हाम्रा लागि नेपाल चिनाउने पर्व नै हो जस्तो लाग्छ, विदेशी समुदायमाझ हाम्रो आफ्नो मौलिक परिचय दिने अवसरको रुपमा पनि लिन्छु म। हाम्रो भेषभुषा, भाषा, खाना, रहनसहन अनि रितिरिवाजलाई हाम्रो दोस्रो पुस्ता अनि यहाँको बहुसांस्कृतिक समुदायसामु लैजाने एउटा महत्वपूर्ण माध्यम नै बनेको छ नेपाल फेस्टिवल। यही उद्देश्यका साथ नै मेलबर्नमा २००८ देखि नेपाल फेस्टिवलको आयोजना गर्न सुरु गरिएको थियो। त्यसकै निरन्तरता नै नेपाल फेस्टिवल २०२२ हो।
यस दिन एनआरएनएसंगै यहाँ संचालित नेपाली सामाजिक संस्थाहरु मिलेर नेपालको पहिचान सहितको कला तथा सांस्कृतिक झांकिहरुको पर्दशन गर्ने गरिन्छ, सांस्कृतिक परेड हुन्छ । यसमा पक्कै पनि एउटा सींगो नेपालको परिचय लुकेको हुन्छ । हिमाल पहाड अनी तराई, त्यसैगरी, पूर्वको किराँत संस्कृतिदेखी सुदुरपश्चिमको देउडा, तराईको थारु नाचदेखि हिमालको श्याब्रू अनी पहाडको भजन र पञ्चे बाजा सबैको परिचय झल्कने गरी परेडको आयोजना हुँदैछ।
नेपाल फेस्टिवल मेलबर्नको सांस्कृतिक परेड भन्ने बित्तिकै 'तारा गैरे' नाम अगाडि आउँछ । कस्तो महसुस गर्नुहुन्छ?
नेपाल फेस्टिवल मेलबर्नमा २०१४ देखि सांस्कृतिक परेडको सुरुवात भएको हो। मैले उक्त वर्ष अर्थात नेपाल फेस्टिवल मेलबर्नको पहिलो सांस्कृतिक परेडमा नेतृत्व गर्ने अवसर प्राप्त गरें। त्यसयता हरेक पटकको नेपाल फेस्टिवलमा सांस्कृतिक परेड हुँदै आएको छ र हरेक पटकको परेडमा संयोजकमा रुपमा रहँदै आएको छु। यो पटक पनि यो जिम्मेवारी ममा आएको छ। यसलाई म जिम्मेवारीसंगै आफ्नो देशलाई चिनाउन पाउने एउटा सुन्दर अवसरको रुपमा लिन्छु। यहाँको सडकमा नेपालीको मौलिकता र विविधतामा एकता दर्शाउँदै परेड अगाडी बढ्दै गर्दा, गर्वले मन ढक्क फुल्छ।
हाम्रो देश सांस्कृतिक विविधता सहितको साझा फुलबारी हो अनी त्यसमाथी म गल्कोटबाट यहाँ आएको हुँ। सानो हुँदा बिभिन्न सांस्कृतिक झाँकीहरुको प्रदर्शन देखेको हुनाले पनि मलाई सबै खाले कल्चरल ग्रुपहरुलाई एक ठाउँमा परेडको रुपमा देखाउन पाए धेरै राम्रो हुनेथियो जस्तो लाग्थ्यो। त्यसैले यो नेपाल फेस्टिबलको यो प्लेटफोर्म युज गर्न पाउँदा अत्यन्तै खुसी लाग्छ ।
1661509889.jpg)
विभिन्न समुदायको नेतृत्व र सबै संस्कृतिक पक्ष समेट्नु पर्ने हुँदा परेड आयोजना गर्न कत्तिको सजिलो छ ?
यसमा सबैको साथ छ सहयोग छ । मैले त एउटा संयोजकको काम मात्रै गरेको हूँ । त्यसमाथि ३ वटा नेपाल फेस्टिबलमा नै परेड को जीम्मेवारि लिएको हुनाले अहिले काम गर्न सजिलो भएको छ। यसपाली दिदी बहिनी समाज भिक्टोरियाले पनि परेडमा विशेष सहयोग गरेको छ । उहाँँहरुलाई पनि विशेष धन्यवाद दिन चाहन्छु।
यसपालीको परेडमा केही नयाँपनको अपेक्षा गर्न सकिन्छ कि ?
पक्कै पनि । पहिलो कुरा त परेडको रुट नै चेन्ज भएको छ । हामी यसपाली पार्लियामेन्ट हाउस नजिकै जम्मा भएर जादै छौ अनी २०१८ को भन्दा अझि धेरैको सहभागिता छ । जे होस् हरेक बर्ष केही नयाँ गर्ने प्रयास नै हुनेगर्छ परेडमा।
परेडमा मल्टिकल्चरल कम्यूनिटिको कस्तो सहभागिता हुनेछ?
परेडकोको मुख्य उद्देश्य भनेको नेपाल चिनाउने हो। त्यसैले सबै नेपाली समुदायको सांस्कृतिक प्रदर्शनी हुन्छ तर पनि नेपाललाई माया गर्ने यहाँको मल्टीकल्चरल कम्युनिटीको तर्फबाट केही ब्यक्तित्वहरुको पनि सहभागिताको अपेक्षा गरेका छौ।
परेड कुन समयमा शुरु हुन्छ?
परेड बिहान ठीक १०:३० बजे पार्लियामेन्ट हाउस नजिकै बाट शुरु हुन्छ। परेडको अर्डर कस्तो हुन्छ भन्ने कुरा चाहिं हामी एक हप्ता अगाडी जानकारी गराउनेछौँ। त्यसैले हामी १० बजे नै त्यहाँ भेला हुनुपर्ने हुन्छ । मेरो सबैलाई आग्रह पनि छ कि, कृपया समयमा नै आउनु होला हामी १०:३० मा हिंड्नै पर्ने हुन्छ।
अन्त्यमा, केही भन्न चाहनुहुन्छ कि?
हाम्रो मौलिक परिचय, हाम्रो एकता देखाउने, नयाँ पुस्तालाई नेपालप्रतिको हाम्रो भावनात्मक सम्बन्धसंग जोड्ने योभन्दा ठूलो अवसर अरु हुनै सक्दैन । त्यसैले सबैलाई सेप्टेम्बर १० मा हुने नेपाल फेस्टिवल मेलबर्नमा सहभागी हुन अनुरोध गर्न चाहन्छु।
-1723260540.jpeg)
-1722510781.jpg)
