काठमाडौँ । नेपाली काँग्रेसले प्रधानमन्त्री पुष्पकमल दाहाललाई विश्वासको मत दिने सम्भावना बढेको छ ।
गैरवामपन्थी ध्रुवीकरणबाट तत्काल सत्ता फर्काउने सम्भावना नदेखिएपछि कांग्रेस सभापति शेरबहादुर देउवाले प्रधानमन्त्री दाहाललाई विश्वासको मत दिने विषयमा पार्टीभित्र छलफल शुरु गर्नुभएको छ । यसलाई काँग्रेसको माओवादीसँग सत्ता समीकरणको सम्भावना जीवित राख्ने रणनीतिका रुपमा हेरिएको छ । कुनै पनि बेला एमाले अध्यक्ष केपी शर्मा ओलीसँग दाहालको खटपट हुने आकलनसहित देउवाले विश्वासको मत दिने विषयमा पार्टीभित्र परामर्श थाल्नुभएको हो ।
सिंहदरबारस्थित कार्यालयमा शनिबार बसेको कांग्रेस संसदीय दल बैठकको निर्णयमा पार्टी प्रमुख प्रतिपक्षमा बस्ने उल्लेख छैन । ‘प्रतिनिधिसभामा प्रभावकारी र जिम्मेवार भूमिका निभाउँदै जनताको विश्वास र पार्टीका साथीहरूको अपेक्षाबमोजिम कार्य गर्न एकताबद्ध ढंगले अघि बढ्न यो बैठक प्रतिबद्धता व्यक्त गर्दछ,’ निर्णयमा भनिएको छ ।
बैठकमा सांसदहरूलाई बोल्ने समय नै दिइएको थिएन । प्रमुख सचेतक रमेश लेखकले निर्णय गराउनुपर्ने बुँदाहरू प्रस्तुत गरेर देउवाले संक्षिप्त मन्तव्य राखेपछि बैठक २६ गते बस्ने गरी टुंग्याइएको थियो । बैठक सकिएपछि देउवाले दलकै कार्यालयमा पार्टीका शीर्ष नेताहरूसँग केहीबेर छलफल गर्नुभएको थियो । सरकारलाई विश्वासको मत दिने वा नदिने निर्णय दलको २६ मा बस्ने बैठकले गर्ने प्रमुख सचेतक लेखकले बताउनुभयो ।
‘विदेशी शक्तिको आड’ र आफ्नै कोटरीको विश्वासमा पर्दा सत्ता र शक्ति गुमाउनुपरेका कारण पछुताइरहेका देउवाले यस पटक भने अन्य शीर्ष नेतासँग राय–सुझाव लिइरहनुभएको छ । खासगरी उहाँले अर्को पक्षका नेता शेखर कोइरालाका साथै महामन्त्रीद्वय गगन थापा र विश्वप्रकाश शर्मालाई पनि विश्वासमा राख्न खोज्नुभएको छ । शुक्रबार महामन्त्रीद्वयलाई निवासमै बोलाएर छलफल गर्नुभएका उहाँले शेखर, शशांक कोइरालासहित पार्टीका शीर्ष तहका नेताहरूसँग छलफल गरिरहनुभएको छ ।
पाँच वर्ष प्रतिपक्षमा बस्ने हो भने त्यही किसिमको तयारी गर्नुपर्ने र भोलिको राजनीति पनि हेर्ने हो भने सहमतिका साथ जानुपर्ने भएकोले त्यसका लागि सरकारलाई समर्थन दिनुपर्ने नेता शेखरको भनाइ छ ।
विश्वासको मत दिने वा नदिने निर्णय लिँदा कांग्रेसले आफ्ना मतदाता र कार्यकर्तालाई प्रस्टसँग भन्न सक्नुपर्ने उहाँले बताउनुभयो ।
कांग्रेस नेता रामचन्द्र पौडेल पनि केही समयअघिदेखि नै सहमतीय सरकार भन्दै सरकारलाई विश्वासको मत दिने पक्षमा उभिनुभएको छ । सरकारलाई विश्वासको मत दिँदा राष्ट्रपति निर्वाचनमा नयाँ ध्रुवीकरणको सम्भावना हुन सक्ने उहाँको आकलन छ ।
तर महामन्त्रीद्वय थापा र शर्मा भने सरकारलाई विश्वासको मत नदिई प्रमुख प्रतिपक्षको भूमिकामा बस्नुपर्ने अडानमा हुनुहुन्छ । उहाँहरूको यो अडानसँग पार्टीको ठूलो तप्का जोडिएको छ ।
-1723260540.jpeg)
-1722510781.jpg)
