काठमाडौं । नेपाली कांग्रेस राष्ट्रपति आफैँले राखेर प्रधानमन्त्रीमा खुला रहने सहमतिमा पुगेको छ ।
राष्ट्रपति आफैँले राख्ने र सरकारको नेतृत्वमा खुला रहने विकल्पसहित कांग्रेसले सत्तागठबन्धनका अन्य दलहरूसँग संवाद अघि बढाएको हो । आलोपालो प्रधानमन्त्रीमा पहिलो कार्यकालका लागि खुला रहने कांग्रेसको प्रस्ताव छ । तर राष्ट्रपति भने उसको मुख्य बटमलाइन छ ।
स्रोतका अनुसार सरकारको नेतृत्वबारे कांग्रेसले दुई विकल्प अघि सारेर छलफल चलाएको छ । पहिलो विकल्पमा सुरुका दुई वर्ष सभापति शेरबहादुर देउवालाई प्रधानमन्त्री बन्ने, त्यसपछिका दुई वर्ष माओवादी अध्यक्ष प्रचण्ड र अन्तिम एक वर्ष एकीकृत समाजवादीका अध्यक्ष माधव नेपाललाई प्रधानमन्त्री बनाउने प्रस्ताव छ । त्यस्तै, दोस्रो विकल्पमा सुरुका दुई वर्ष प्रचण्ड, त्यसपछिका दुई वर्ष देउवा र अन्तिम एक वर्ष नेपाललाई प्रधानमन्त्री बनाएर जान सकिने प्रस्ताव कांग्रेसको छ ।
आफूले राष्ट्रपति राख्दा माओवादीलाई सभामुख र उपराष्ट्रपति तथा एकीकृत समाजवादीलाई राष्ट्रिय सभाको अध्यक्ष र उपसभामुख दिने कांग्रेसको प्रस्ताव छ । यसबाहेक गठबन्धनमा रहेका लोसपा र सरकारमा सहभागी हुन तयार नागरिक उन्मुक्ति पार्टी तथा जनमत पार्टीलाई मन्त्री दिएर सत्तासमीकरणको टुंगो लगाउने गरी छलफल गरिरहेको छ ।
अन्य विषयमा करिब–करिब सहमति जुटे पनि मुख्य विषय रहेको प्रधानमन्त्रीमा पहिलो दुई वर्ष कांग्रेस या माओवादी भन्नेमा मात्रै निष्कर्ष निकाल्न बाँकी रहेको प्रधानमन्त्री देउवानिकट कांग्रेसका एक नेताले बताए । ‘दुई विकल्पमाथि छलफल भइरहेको छ । टुंगो लाग्न बाँकी प्रमुख विषय भनेको प्रधानमन्त्रीमा देउवा कि प्रचण्ड पहिला भन्ने नै हो,’ संवादमा सहभागी ती नेताले भने ।
कांग्रेसको प्रस्तावमा सहमत गराउन सभापति देउवासहित उपसभापति पूर्णबहादुर खड्का, पूर्वउपसभापति विमलेन्द्र निधि, प्रवक्ता डा प्रकाशशरण महत, नेता एनपी साउदलगायतले अध्यक्ष प्रचण्ड, अध्यक्ष नेपाल र सरकारमा जाने तयारीमा रहेका दलहरूसँग निरन्तर छलफल गरिरहेका छन् ।
सांसदहरूको शपथसँगै पार्टी र गठबन्धनमा छलफल सुरु भएको नेता निधिले बताए । निधिले सरकार निर्माण र शक्ति बाँडफाँडका विषयमा औपचारिक प्रस्ताव भने तयार भइनसकेको दाबी गरे । सरकारमा सहभागी हुने दलहरूसँग पनि सम्पर्क भइरहेको उनले बताए ।
नेता साउदले गठबन्धनकै नेतृत्वमा अन्य दल र स्वतन्त्र सांसदलाई समेटेर सरकार बनाउने गृहकार्य भइरहेको बतए ।
कांग्रेस नेताहरूका अनुसार जनमत पार्टी र नागरिक उन्मुक्ति पार्टी सरकारमा सहभागी हुने तयारीमा छन् । राष्ट्रिय स्वतन्त्र पार्टीसमेत सहकार्यका लागि इच्छुक रहेको उनीहरूको दाबी छ ।
सभापति देउवाले भने अध्यक्ष प्रचण्डसँग पहिलो कार्यकालमा नै राष्ट्रपति र प्रधानमन्त्री दुवै कांग्रेसले पाउने गरी मनाउने प्रयास गरिरहेका छन् । कांग्रेसले राष्ट्रपतिका लागि भने वरिष्ठ नेता रामचन्द्र पौडेललाई निर्विकल्प रूपमा अगाडि सारेको छ ।
-1723260540.jpeg)
-1722510781.jpg)
