काठमाडौं । नेकपा एमालेका अध्यक्ष केपी शर्मा ओलीले भोट हाल्नुअघि भविष्य सम्झन मतदाताहरूलाई आग्रह गर्नुभएको छ ।
सामाजिक सञ्जाल फेसबुकमार्फत भिडियो सन्देश सार्वजनिक गर्दै अध्यक्ष ओलीले मंसिर ४ मा हाल्ने भोटले नै अबको ५ वर्ष कसको हातमा देश सुम्पने भन्ने निर्क्योल हुने भन्दै भोट हाल्नअघि सोच्न आग्रह गर्नुभएको हो।
‘प्रिय मतदाता, अब स्पष्ट निर्णय लिने समय आएको छ । किनकि मंसिर ४ गते तपाईँले हाल्ने भोटले अबको ५ वर्ष कसको हातमा देश सुम्पने भन्ने कुराको निर्क्योल गर्छ । शेरबहादुर देउवाको हातमा कि म केपी शर्मा ओलीको हातमा ?’, ओलीले सन्देशमा प्रश्न गर्नुभएको छ, ‘त्यसैले भोट हाल्नुअघि दुई भविष्यलाई सम्झनुहोला । पहिलो तपाईँको आफ्नै भविष्य र दोस्रो तपाईँका छोराछोरीको भविष्य ।’
‘म झुटो बोल्दिन, सत्य छोड्दिनँ । तपाईलाई थाहा छ म पटक पटक मृत्युको मुखमा पुगेर फर्किएको व्यक्ति हुँ । अहिले देश केही व्यक्ति र समूहको निजी स्वार्थले जोडिएर बनेको गठबन्धनले चलाइरहेको छ’, पूर्वप्रधानमन्त्री समेत रहनुभएका ओलीले भन्नुभएको छ, ‘जसको कुनै राष्ट्रिय उद्देश्य छैन । यही गठबन्धन रहिरहे मुलुक वरवाद हुनेछ । तपाई र तपाईका छोराछोरीको भविष्य समेत वरवाद हुनेछ । त्यसैले आज म यस सन्देशमार्फत भोट माग्दैछु ।’
उहाँले आफूले मागेको भोट एमालेको जितका लागि नभई मतदाता र मतदताका सन्तानको सुखका साथै राष्ट्रिय हित, स्वाधीनता, स्वाभिमानको रक्षा र ५ वर्ष टिक्ने स्थिर सरकारका लागि भएको बताउनुभएको हो ।
-1723260540.jpeg)
-1722510781.jpg)
