काठमाडौं । प्रधानमन्त्री पुष्पकमल दाहाल प्रचण्डले संसदबाट विश्वासको मत प्राप्त गरेसँगै मन्त्रिपरिषदलाई पूर्णत दिने तयारी गर्नुभएको छ ।
मन्त्रालय भागबन्डाको विषयमा प्रधानमन्त्रीले बुधवार सत्ता गठबन्धनका संयोजक तथा एमाले अध्यक्ष केपी शर्मा ओलीसँग उहाँकै निवास बालकोट पुगेर छलफल गर्नुभएको छ । दुई शीर्ष नेताबीचको छलफलपछि सत्ता गठबन्धनको बैठक आज दिउँसो १ बजेका लागि बोलाइएको छ । आजको बैठकमा मन्त्रालयको भागबन्डाबारे छलफल केन्द्रीत हुने प्रधानमन्त्री प्रचण्डको सचिवालयले जनाएको छ ।
सत्ता गठबन्धनमा एमालेले ८, माओवादीले ६, रास्वपाले ३, राप्रपाले ३, जसपाले २ र जनमत पार्टीले १ मन्त्रालयमा दाबी गरेका छन् । स्वतन्त्र सांसदले पनि मन्त्रीमा आकांक्षा राखेका छन् । सरकारको नेतृत्व र भौतिक पूर्वाधार तथा यातायात मन्त्रालय लिएको माओवादीले परराष्ट्र, सञ्चार तथा सूचना प्रविधिसहित ६ मन्त्रालय आफूसँग राख्ने तयारी गरेको बालुवाटार स्रोतले जनाएको छ । माओवादीको चिह्नबाट चुनाव जितेका बाबुराम भट्टराई नेतृत्वको नेपाल समाजवादी पार्टीका महिन्द्रराय यादवलाई पनि मन्त्री बनाउने सम्भावना छ ।
एमालेले रक्षा, संस्कृति, पर्यटन तथा नागरिक उड्डयन र राष्ट्रिय स्वतन्त्र पार्टीले श्रम, रोजगार तथा सामाजिक, शिक्षा, विज्ञान तथा प्रविधि, स्वास्थ्य तथा जनसंख्या मन्त्रालय दाबी गरेका छन् । राप्रपाले तीन मन्त्रालय दाबी गरे पनि ऊर्जा, जलस्रोत तथा सिँचाइसहित दुई मन्त्रालय मनाउने प्रयासमा प्रधानमन्त्री छन् । जसपाले परराष्ट्र, सहरी विकास तथा गरिबी निवारण मन्त्रालय लिन खोजेको छ ।
जनमत पार्टीले उद्योग वाणिज्य तथा आपूर्ति मन्त्रालय दाबी गरेको प्रवक्ता चन्दन सिंहले जानकारी दिए । जसपा अध्यक्ष उपेन्द्र यादवले मन्त्रालयको भागबन्डा सम्मानजनक रूपमा हुनुपर्ने बताए ।
नागरिक उन्मुक्ति पार्टी भने रेशम चौधरीलगायतका नेता–कार्यकर्ता रिहाइपछि मात्र सरकारमा जाने भएको छ । ‘प्रधानमन्त्रीजी र केपीजीले राजबन्दी रिहा गर्ने वचन दिनुभएकाले सुदूरपश्चिम सरकारलाई समर्थन गरेका छौं,’ नागरिक उन्मुक्ति पार्टीकी अध्यक्ष रञ्जिता श्रेष्ठले भनिन्, ‘वचन कार्यान्वयन भएपछि हामी सरकारमा जान सक्छौं ।’
मन्त्रीका आकांक्षी को–को ?
एमालेबाट मन्त्रीका लागि पृथ्वीसुब्बा गुरुङ, योगेश भट्टराई, विद्या भट्टराई, भगवती चौधरी, एलपी साँवा र छविलाल विश्वकर्मा मुख्य आकांक्षी छन् । एमालेमा पहिलो पटक सांसद बनेका ठाकुर गैरे र महेश बर्तौलाले पनि मन्त्रीमा दाबी गरेका छन् । माओवादीले भौगोलिक, जातीय र युवाको मापदण्ड बनाएर मन्त्री बनाउने तयारी गरेको छ । माओवादीबाट रेखा शर्मा, महेन्द्रबहादुर शाही, अमनलाल मोदी, हितबहादुर तामाङ, माधव सापकोटा, सूर्यमान दोङ, हरि चौधरी, महेन्द्र यादव, सुदन किरातीले मन्त्रीमा दाबी गरेका छन् ।
राष्ट्रिय स्वतन्त्र पार्टीबाट सन्तोष परियार, शिशिर खनाल, डोलप्रसाद अर्याल, तोसिमा कार्की, चन्दा कार्कीले मन्त्री बन्न चाहेका छन् । सभापति रवि लामिछाने उपप्रधानसहित गृहमन्त्री भइसकेका छन् । जसपामा अशोक राई, राजकिशोर यादव, रामसहायप्रसाद यादव र प्रदीप यादव मन्त्री बन्न इच्छुक देखिएको एक नेताले बताए । स्वतन्त्र सांसदहरू अमेरशकुमार सिंह र प्रभु साह मन्त्री बन्न प्रधानमन्त्री दाहालसँग संवादमा छन् ।
मन्त्रिपरिषद्ले पूर्णता पाएपछि सभामुख र उपभामुखको उम्मेदवार टुंगो लगाउने सत्ता साझेदार दलको तयारी छ । सभामुखको निर्वाचन माघ ५ मा हुने भएको छ । सभामुखका लागि एमालेबाट पृथ्वीसुब्बा गुरुङ, छविलाल विश्वकर्मा र देवराज घिमिरेको नाम चर्चामा छ । उपसभामुख पद कुन पार्टीले लिने भन्ने टुंगो लागेको छैन । उपसभामुखमा माओवादी, राप्रपा र जसपाको दाबी छ ।
-1723260540.jpeg)
-1722510781.jpg)
