काठमाडौँ । देशभर चुनावी परिणाम र कतार विश्वकप फुटबलमा सबै मग्न भइरहेको बेला गायिका बुनु श्रेष्ठलाई भने बेग्लै चटारो थियो । मंसिर नलाग्दै शुरु भएको उनको दौडधुप मंसिर १७ गते शनिवारसम्म जारी रह्यो । उक्त दिन ३१ औं अन्तराष्ट्रिय अपांगता दिवस भएकोले उनको दौडधुप बढेको हो । अपांगता दिवसको सन्दर्भमा काठमाडौंमा आयोजना गरिने कार्यक्रममा आफ्नो पछिल्लो गीतको म्यूजिक भिडियो रिलिज गर्न उनले ठूलै पापड बेल्नुपर्यो । समयमा म्यूजिक भिडियो तयार होला कि नहोला भन्ने चिन्ता त छँदै थियो, गीत र भिडियाेप्रति कस्ताे फिडब्याक आउँला भन्ने अर्काे व्यग्र प्रतीक्षाकाे विषय थियाे ।
जब देशभरबाट जम्मा भएका एक हजारभन्दा बढी सरोकारवाला दर्शकहरुबीच आऊ साथी एउटा वाचा गरौं बोलको गीतमा निर्माण गरिएको म्यूजिक भिडियो प्रिमियर सम्पन्न भयो, तब उनले ठूलो युद्ध जितेभन्दा बढी सन्तुष्टिको अनुभव गरिन् । किनभने उनले निर्माण गरेको उक्त म्यूजिक भिडियो आम हेर्ने संगीतभन्दा फरक छ । फरक यस अर्थमा कि उक्त म्यूजिक भिडियोले विभिन्न कारण अपांगता भएका व्यक्तिहरुलाई प्रेरणा र उर्जा प्रदान गर्छ । अपांगता हुनु जीवन र हरेक सम्भावनाको अन्त्य होइन, यसपछि पनि जीवनमा नयाँ सम्भावनाका ढोका खोल्न सक्छन् भन्ने सन्देश बोकेको छ । अर्थात बुनु र उनको टिमको पछिल्लो सिर्जनाले अपांगता भएकाहरुलाई मनमा उमंग र आशा सिर्जना गरेर जीवनमा अघि बढ्न आह्वान गर्दछ ।
गीत संगीत मनोरञ्जनका लागि मात्र होइन समाज परिवर्तनको माध्यम पनि बनाउन सकिन्छ भन्ने मध्येकी एक हुन् गायिका बुनु । त्यसैले उनी बेलामौकामा गीतसंगीत मार्फत समाज रुपान्तरणमा जुट्छिन् । त्यसमा पनि उनले रोजेको क्षेत्र हो अपाङ्गता ।
अपाङ्गता हुनु कुनै धर्म वा पापको फल होइन, अहिलेको आधुनिक जीवनशैलीले जतिखेर जो पनि अपाङ्गता बन्न सक्छन् । तर हाम्रो सोंच र हिम्मतलाई हामीले कहिले अपाङ्गता हुन दिनुहुँदैन । म मेरा गीतहरु मार्फत समाजलाई अपिल गर्न चाहन्छु, बुनु भन्छिन् । उनले यसअघि पनि अपाङ्गता भएकी छोरी र आमाको मनोवेदनामा आधारित आमा बोलको गीत सार्वजनिक गरेकी थिइन् ।
बुनु अहिलेको सहज प्रविधिको भरमा लहड वा रहरमा संगीत क्षेत्रमा लागेकी होइनन् । उनको पहिलो गीत रेकर्ड भएको मितिलाई नै हिसाव गर्दा पनि झण्डै ३ दशक पुग्छ उनले संगीत क्षेत्रमा लगानी गरेको समय । यसबीचमा उनले हरेक विधाका गीत गाइन् । तर उनको अनभवमा सामाजिक सन्देशयुक्त गीतहरुले दिने आत्मिक सन्तुष्टि छुट्टै हुन्छ । जुन अलौकिक लाग्छ उनलाई ।
सर्वप्रिय विधा संगीतको माध्यमबाट अपाङ्गता भएकाहरुप्रति हेर्ने समाजको दृष्टिकोण बदल्न बुनुले थालेको यस अभियानमा उनले जीवनसाथी जो आफैं कुशल साउन्ड इञ्जिनियर हुन्, महेश्वरमान राजभण्डारीको भरपुर साथ पाएकी छिन् । त्यसमा थपिएका छन् गीतकार नरेश प्रधान । उनी आफैं अपाङ्ता परिवारका सदस्य हुन् । उनी एक सेरिब्रल पाल्सी प्रभावित नानीका बाबु हुन् ।आफ्नी छोरीमा भएको शारीरिक अपाङ्तालाई उनले छोरीको कमजोरीको रुपमा कहिले पनि लिएका छैनन् । किनभने अपाङ्ता हुनु दुर्वल वा कमजोर हुनु होइन भन्ने उनले राम्रोसँग बुझेका छन् । तर पनि नेपाली समाजलाई यसबारेमा अझै बुझाउन बाँकी छ भन्ने बुझेर उनले शब्दहरु कोरे–
आऊ साथी एउटा खुशीको दियो बालौं
परिवर्तनको एउटा मीठो सन्देश बाढौं ।
नेपाली समाजलाई जागृत गराएर अपाङ्ता भएकाहरुप्रति उनीहरुको हेर्ने दृष्टिकोणमा सकरात्मक परिवर्तन ल्याउने गीतकार प्रधानको यो महत्वाकांक्षी सपना गायिका बुनु श्रेष्ठले पनि आत्मसात गरिन् । अनि उनकै सक्रियतामा तयार भयो– एउटा अर्थपूर्ण गीत र म्यूजिक भिडियो आऊ साथी एउटा खुशीको दियो बालौं ।
नरेश प्रधानको शब्दहरुलाई प्रतिभाशाली संगीतकार शक्ति बल्लभको संगीतले अझ जीवन्त बनाएको छ । अपांगता भएका व्यक्तिहरुका लागि मानक गीत बनाउने बुनु श्रेष्ठको अभियानमा वरिष्ठ कलाकार जोडी मदनकृष्ण श्रेष्ठ, हरिवंश आचार्यदेखि अञ्जु पन्त, शिव परियार,पुष्पन प्रधान र अस्मिता अधिकारीले बुनुसँग सांगीतिक हातेमालो गरेका छन् ।एउटा राम्रो गीत तयार हुन राम्रो टिम आवश्यक पर्छ । यसपटक बुनु यसअर्थमा अझ बढी भाग्यमानी सावित भएकी छिन् । किनभने उनले श्रव्य र दृश्य दुवैमा टिमबाट राम्रो सपोर्ट पाएकी छिन् । अस्वस्थ्य अवस्थामा पनि वरिष्ठ अभिनेता मदनकृष्ण श्रेष्ठ र व्यस्तताका वावजुद हरिवंश आचार्यले समय दिएर गीतको गरिमा मात्र बढाएका छैनन् समाजप्रति उत्तरदायी बन्न प्रेरित गरेको बुनु बताउँछिन् ।
गीतकार नरेशसँग बुनुको यो चौथो सहकार्य हो । यसअघि उनले नभन मेरो भाग्य,साथ हुँदैमा र आमा बोलका ३ गीतमा नरेशसँग सहकार्य गरिसकेकी छिन् । जीवनको भोगाइलाई सरल र सरस शब्द मार्फत हरेक गीतलाई बेग्लै जीवन दिनसक्ने नरेशबाट उनी निकै प्रभावित छिन् । बुनु भन्छिन्–नरेशजीले लेख्नुभएका गीतहरु आफैंमा पूर्ण हुन्छन् । हामीले त त्यसलाई गति मात्र दिएका हौं ।
नारन खतिवडा र अनिरुद्ध आत्रेयको कथा अनि माेहन राईकाे कुशल निर्देशनले म्यूजिक भिडियोलाई अर्थपूर्ण बनाएको छ । गीतको भिडियोमा अपांगता भएका अर्थात विशेष क्षमता भएका व्यक्तिहरूको फरक फरक क्षमतालाई उजागार गरेको छ । विमललाल श्रेष्ठको परिकल्पनामा निर्माण भएको भिडियोमा उषा रजक, रस्मी भट्ट, रक्षा थापा, सुन्दर धिताल, आईपी आचार्य, प्रकाश सुवेदी, प्रिन्सप्रसिद सिंह थापा, देवकुमार श्रेष्ठ, सविना थापा, विकास रिमाल लगायतका कलाकारहरुको अभिनय रहेको छ । भिडियोलाई शरद महतोले छायाँकन गरेका हुन् ।
गीत चल्नु र त्यसभित्रका भावलाई आत्मसात गर्नु फरक कुरा हुन् । बुनु र उनको टिम यस गीतभित्र निहीत सन्देश र भावलाई नेपाली समाजले अवश्य ग्रहण र मनन् गर्नेछन् भन्नेमा आशावादी छन् । बुनु भन्छिन्–युट्युवमा भिडियोले पाएको भ्यूज,लाइक्स र कमेन्टस् बरु शुन्य होस्, यो गीत सुनेर र भिडियो हेरेर अपाङ्गता भएकाहरुप्रतिको साँघुरो सोंचमा केही परिवर्तन भए हाम्रो गीत सुपरहिट भयो भन्ने सोंच्नेछौं ।
-1723260540.jpeg)
-1722510781.jpg)
