काठमाडौं । मंसीर ४ मा सम्पन्न प्रतिनिधि सभा निर्वाचनको समानुपातिकतर्फको मतगणना अन्तिम चरणमा छ।
यो निर्वाचनमा एक करोड ७९ लाख ८८ हजार मतदातामध्ये ६१ प्रतिशत हाराहारीमा मतदान भएको अनुमान छ। यसले एक करोड १० लाख हाराहारी मतदाताले मतदान गरेको देखिन्छ। अघिल्ला निर्वाचनको जस्तै तीन प्रतिशत मत बदर भएको अनुमान गर्दा एक करोड ६ लाख ७० हजार हाराहारीमा मत सदर भएको अनुमान लगाउन मिल्छ। यसरी हेर्दा अब १८ लाख जति सदर मत गणना गर्न बाँकी छ।
निर्वाचन आयोगका अनुसार ९० लाख ९८ हजार २ सय ६८ मत गन्दा नेकपा एमालेको अग्रता कायमै छ । एमालेले २४ लाख ७९ हजार ९ सय मत प्राप्त गरेको छ । दोस्रो स्थानमा रहेको कांग्रेसको २३ लाख ५७ हजार ८ सय १७ मत आएको छ। राष्ट्रिय स्वतन्त्र पार्टीले १० लाख ४९ हजार २ सय ८३ मत हासिल गरी तेस्रो स्थान बनाएको छ। नेकपा माओवादी केन्द्र चौथो स्थानमा छ ।
योसँगै समानुपातिक प्रणालीका ११० सीटमध्ये कुन पार्टीले कति ल्याउला भन्नेमा सर्वत्र चासो छ।
तथ्याङ्कशास्त्री समीर केसीले अहिलेसम्मको मतको गणनाका आधारमा एमालेले समानुपातिकतर्फ ३५ भन्दा केही बढी सीट पाउनेछ। अहिलेसम्मको मतलाई अन्तिम मान्दा समानुपातिकतर्फ कांग्रेसले ३३ बढी सीट पाउनेछ।
नेकपा माओवादी केन्द्र र राष्ट्रिय स्वतन्त्र पार्टी दुवैले समानुपातिकमा १०–१० लाखको सीमा पार गरेका छन्। दुवै दलले समानुपातिकतर्फ कम्तीमा १५–१५ सीट पाउने अनुमान तथ्याङ्कशास्त्री केसीको छ।
राष्ट्रिय प्रजातन्त्र पार्टीले समानुपातिकमा आठ सीट र जनता समाजवादी पार्टीले चार सीट पाउने अनुमान गरिएको छ। समानुपातिक मतगणनामा राष्ट्रिय प्रजातन्त्र पार्टीले पाँच लाखभन्दा धेरै र जनता समाजवादी पार्टीले तीन लाखभन्दा धेरै मत पाइसकेका छन्।
नेकपा एकीकृत समाजवादीको समानुपातिक मत भने दुई लाख ३९ हजार छ। यसले अहिलेसम्मको गणनाको अनुपातमा ‘थ्रेसहोल्ड’ पार गर्ने नदेखिएको तथ्याङ्कशास्त्री केसीको विश्लेषण छ। कानून अनुसार, समानुपातिक प्रणालीको सीटमा भाग पाउन कुल सदर मतको तीन प्रतिशत मत ल्याउनुपर्छ।
-1723260540.jpeg)
-1722510781.jpg)
