काठमाडौं । एमसीसी संसदबाट अनुमोदनपछि पहिलोपटक विहीवार विहान बसेको सत्ता गठबन्धन बैठकमा एमसीसी अनुमोदन भएकोमा प्रधानमन्त्री शेरबहादुर देउवाको प्रशंसा भएको छ ।
नेकपा माओवादी केन्द्रका अध्यक्ष पुष्पकमल दाहाल, एकीकृत समाजवादी अध्यक्ष माधवकुमार नेपाल र जसपाका अध्यक्षद्वय उपेन्द्र यादव र डा बाबुराम भट्टराईले एमसीसी अनुमोदन गराउन सफल भएकोमा प्रधानमन्त्री देउवाको प्रशंसा गर्नुभएको थियो ।
तर बैठकमा सहभागी एकीकृत समाजवादीका सम्मानित नेता झलनाथ खनाल र माओवादी केन्द्रका वरिष्ठ नेता नारायणकाजी श्रेष्ठ भने असन्तुष्ट हुनुहुन्थ्यो । गठबन्धन बैठकमा राष्ट्रहित विपरितको एमसीसी सम्झौता अनुमोदन गराएकोमा सरकारको आलोचना हुनुपर्नेमा उल्टै प्रशंसा गरिएको भन्दै नेताद्वयले गम्भीर आपत्ति जनाउनुभएको थियो ।
एमसीसीको विपक्षमा रहँदै आउनुभएका नेता खनाल र श्रेष्ठ एमसीसी पारित भए यता आ आफ्ना दलका नेतृत्वसँग असन्तुष्ट रहदै आउनुभएको छ । उहाँहरुले खुलेर नेतृत्वको परस्त नीतिको विरोध गर्दै आउनुभएको छ । १२ बूँदे व्याख्यात्मक टिप्पणीको नाममा नेपाली जनतालाई धोका दिइएको उहाँहरुको भनाइ छ । अमेरिकाले अस्वीकार गरेको व्याख्यात्मक टिप्पणीको कुनै अर्थ नभएको खनाल–श्रेष्ठको जिकिर छ ।
बुधवार विराटनगरमा सम्बोधन गर्दै पूर्वप्रधानमन्त्री समेत रहनुभएका नेता खनालले व्याख्यात्मक टिप्पणीलाई थाङ्नोको संज्ञा दिदै नेपाली जनतालाई थाङ्नोमा सुताउने काम भएको भन्दै आलोचना गर्नुभयो । यस्तो परस्त नेतृत्वसँग वैचारिक रुपमा सँगै रहिरहन नसक्ने उहाँको भनाइ थियो । सम्मानित नेता खनालको यस्तो अभिव्यक्तिपछि फेरि एकीकृत समाजवादी फुटको संघारमा पुगेको हो कि भन्ने आशंका समेत गरिन थालेको छ ।
उता माओवादी केन्द्रका वरिष्ठ नेता श्रेष्ठले पनि एमसीसी अनुमोदनमा भूमिका खेलिदिएपछि अध्यक्ष पुष्पकमल दाहालसँग दुरी बढाउनुभएको छ । त्यसैले श्रेष्ठलाई फकाउन अध्यक्ष दाहाल आफैं हात्तीवनस्थित श्रेष्ठ निवास पुग्नुभएको थियो । त्यसको दुईदिन पछि विहीवार पनि दाहालले श्रेष्ठलाई आफ्नो निवास बोलाएर पार्टी छोडेर जानेसम्मको निर्णय नगर्न आग्रह गर्नुभएको स्रोतको भनाइ छ । यसको अर्थ श्रेष्ठ पनि पार्टी परित्यागसम्मको निर्णयमा पुगिसक्नुभएको अनुमान गर्न थालेको छ ।
यसअघि एमसीसीविरुद्ध विभिन्न ६ वामपार्टी र दुई मोर्चाका साथ संघर्षमा उत्रिएको नेकपा महासचिव नेत्रविक्रम चन्द विप्लवले एमसीसीसँग असन्तुष्ट खनाल, श्रेष्ठ र नेमकिपाका अध्यक्ष नारयणमान विजुक्छेसँग भेटवार्ता र छलफल गर्नुभएको छ । विप्लवको यो सक्रियतालाई पनि अर्थपूर्ण रुपमा हेरिएको छ । नेताहरुसँगको भेटमा विप्लवले एमसीसीविरुद्धको सभामा सहभागी हुन आग्रह गर्नुभएको स्रोतको भनाइ छ ।
अर्कोतिर यही निहूँमा नयाँ पार्टी जन्माउने अभ्यास समेत भएको विश्वस्त स्रोतले बतायो । स्रोतका अनुसार नेता झलनाथ खनाललाई अध्यक्ष बनाएर एकीकृत समाजवादीका खनाल निकट र माओवादीका नारायणकाजी श्रेष्ठ पक्षधर नेताहरुसहित नयाँ पार्टी खोल्न विप्लवले राजनीतिक लबिङ समेत शुरु गरेको स्रोतको दाबी छ ।
-1723260540.jpeg)
-1722510781.jpg)
