काठमाडौं । गत स्थानीय तहको निर्वाचनमा काठमाडौं महानगरपालिकाको मेयरमा स्वतन्त्र उम्मेदवार बालेन साहले जितेपछि यसपटक प्रतिनिधिसभा निर्वाचनमा दलहरूलाई टक्कर दिन काठमाडौंका सबैजसो क्षेत्रबाट स्वतन्त्र उम्मेदवार मैदानमा उत्रिने भएका छन् ।
बालेन्द्र साहको जितले उपत्यकाका मतदातामा रहेका प्रमुख दलहरूप्रति असन्तुष्टि पोखिएको भन्दै स्वतन्त्र उम्मेदवार यसको फाइदा उठाउने दाउमा छन् ।
सामाजिक तथा राजनीतिक अभियन्ताका रूपमा परिचित पुकार बमले काठमाडौं– १ बाट स्वतन्त्र उम्मेदवारी दिने घोषणा गरिसकेका छन् । उनी विवेकशील नेपाली दलका संस्थापकमध्येका एक हुन् । ‘अकुपाई बालुवाटार’ अभियान, डा गोविन्द केसीको अनशन, ‘नेपाल खुला छ’ जस्ता प्रतिरोधका राजनीतिक अभियानमा उनले सहभागिता जनाएका थिए ।
काठमाडौं– १ बाटै पूर्वडिआइजी रमेश खरेल पनि चुनाव उठ्ने तयारीमा छन् । भ्रष्टाचारविरुद्धको अभियान भन्दै नेपाल सुशासन पार्टीको नेतृत्व गरिरहेका उनको उम्मेदवारीले पनि मत विभाजनमा भूमिका खेल्ने आकलन छ ।
बिमा व्यवसायी कोषराज सुवेदीले काठमाडौं– २ बाट स्वतन्त्र उम्मेदवारी दिने घोषणा गरेका छन् । उनीसँगै सेयर मार्केटमा सक्रिय रोहन कार्कीले पनि यही क्षेत्रबाट स्वतन्त्र उम्मेदवारी दिने चर्चा छ । काठमाडौं– ३ बाट रेडियोकर्मी हरिशरण लामिछाने स्वतन्त्र उम्मेदवारी दिने तयारीमा छन् ।
काठमाडौं– ४ मा स्वतन्त्र उम्मेदवारी घोषणा गर्नेको संख्या बढ्दै गएको छ । युवा इन्जिनियर आकर्षण पोखरेल, सामाजिक सञ्जालमा चर्चित अर्जुन प्रसाईं, सेयर कारोबारी राधा पोखरेल, समाजसेवी शिवराज पोखरेलसम्मले उम्मेदवारी दिने घोषणा गरेका छन् ।
महानगरको मेयरमा हारेका सामाजिक अभियन्ता सुमन सायमी संघको निर्वाचनमा उठ्ने भएका छन् । उनले काठमाडौं– ८ बाट उम्मेदवारी दिने घोषणा गरेका छन् । मेयरमा उनले १३ हजार सात सय ७० मत ल्याएका थिए ।
मैदानमा फेरि ‘लौरो’
स्थानीय तह निर्वाचनमा निकै चर्चामा आएको चुनाव चिह्न हो– लौरो । कारण, लामो इतिहास बोकेका ठूला दलका लोकप्रिय चुनाव चिह्नलाई पनि यसले नराम्रोसँग हिर्काइदियो । यही चुनाव चिह्नबाट दुई स्वतन्त्र उम्मेदवारले मेयरमा जिते, काठमाडौं महानगरबाट बालेन साह र धरान उपमहानगरपालिकाबाट हर्क साम्पाङ ।
त्यतिवेला उनीहरूसँगै उनीहरूको चुनाव चिह्नले पनि खुब चर्चा पाएको थियो । भोट माग्न जाँदा उनीहरूको नारा नै थियो– ‘लौरा– बुढाबुढीलाई टेकाउन मिल्ने, भ्रष्टाचारीलाई सेकाउन मिल्ने ।’
काठमाडौंमा लौरो चुनाव चिन्हप्रति युवा मतदाताको विशेष लगाव देखिन्छ । तर आउँदो निर्वाचनको परिदृश्य भने दलको पोजिसन र उसले दिने उम्मेदवारमा निर्भर हुने राजनीतिक विश्लेषक प्राध्यापक लोकराज बरालको भनाइ छ । दलहरूले कमजोर उम्मेदवार दिए भने यसको फाइदा स्वतन्त्र उम्मेदवारले उठाउन सक्छन् । तर, स्थानीय निर्वाचनमा बालेन साहले जिते भन्दैमा त्यस्तै परिणाम फेरि दोहोरिन्छ भन्ने ग्यारेन्टीचाहिँ नभएको उनी बताउँछन् ।
उनी भन्छन्–लौरो अभियान चलाउँदैमा नामै नसुनिएका अनुहार देखापरे भने त्यसले फरक नपर्न सक्छ । बालेन्द्र र्याप गायक थिए, युवा मतदाताले उसको पक्षमा लहर चलाउनु उसका लागि फाइदाजनक भयो । तर, सबैले त्यस्तै लहर चलाउन सक्छन् भन्ने छैन । यद्यपि, काठमाडौंका मतदाता अहिलेका राजनीतिक दलहरूबाट ‘फ्रस्टेड’ भएको अवस्था छ ।
स्थानीय निर्वाचनले पनि त्यस्तै देखाएको उनको भनाइ छ । यस्तो अवस्थामा अहिलेसम्म सुनिएका पार्टीका उपत्यकाभित्रका उम्मेदवार खासै आशलाग्दा नदेखिएको बराल बताउँछन् । यसमा दलहरूले विवेक पुर्याएर निर्णय गरेनन् भने स्वतन्त्र उम्मेदवारहरू चुनौती बन्न सक्ने सम्भावना रहेको उनले ठम्याइ छ । तर, स्वतन्त्रबाट उठ्ने उम्मेदवार पनि उस्तै कमजोर भए केही भन्न नसकिने बरालको बुझाइ छ ।
अर्का राजनीतिक विश्लेषक भास्कर गौतमका अनुसार अलिकति प्रतिबद्धता भयो भने स्वतन्त्र उम्मेदवारले नचिताएको परिणाम पनि ल्याउन सक्छन् ।
स्थानीय तहमा निर्वाचित भएका स्वतन्त्र उम्मेदवार बालेन साह र हर्क साम्पाङहरूले अहिले फरक शैली भए पनि जसरी काम गरिरहेका छन्, त्यसले परम्परागत पार्टीलाई दबाब बढेको उनको बुझाइ छ । यसबाट अलिकति प्रतिबद्धता भयो भने स्वतन्त्रले काम गर्न सक्छन् भन्ने सन्देश गइरहेको गौतम बताएछन् । यसको असर आउने निर्वाचनमा निश्चित रुपमा पर्ने उनको धारणा छ । तर कुन क्षेत्रमा कसरी पर्छ, त्यो भने बेग्लै पाटो रहेको उनको भनाइ छ ।
-1723260540.jpeg)
-1722510781.jpg)
