काठमाडौं । अनिश्चितकालीन हवाई हड्तालको घोषणा गरेका वायुसेवा सञ्चालकहरु केही घण्टा नबित्दै पछि हटेका छन् ।
अनिश्चितकालीन हवाई हड्ताल घोषणा गरेर सरकारलाई गलाउने योजनामा रहेका वायुसेवा सञ्चालकहरु आफैं पूर्व घोषणाबाट पछि हटेका हुन् ।
सरकारले अत्यावश्यक सेवा ऐन अन्तर्गत पक्राउ गरी कारबाही गर्ने तथा इजाजत नै खारेज गर्नेसम्मको तयारी गरेपछि वायुसेवा सञ्चालकहरु हवाइ सेवा रोक्ने निर्णयबाट पछि हटेका हुन् ।
उनीहरु उडान नियमित गर्ने तथा सरकारसँग वार्ता पनि जारी राख्ने निष्कर्षमा पुगेका छन् । वायुसेवा सञ्चालक संघले अत्यावश्यक सेवा नै प्रभावित गर्ने गरी बुधबारदेखि सबै आन्तरिक उडान अनिश्चितकालका लागि बन्द गर्ने घोषणा गरेको थियो ।
तर नेपाल नागरिक उड्डयन प्राधिकरण क्यानले उडान बन्द गरे सञ्चालकहरुलाई पक्राउ गरी वायुसेवा सञ्चालन अनुमति (एओसी) नै खारेज गर्नेसम्मको चेतावनी दिएको थियो ।
प्राधिकरणका महानिर्देशक प्रदीप अधिकारीले प्राधिकरणले हवाई सेवा अत्यावश्यक भएको भन्दै उडान बन्द गरे सञ्चालकलाई पक्राउ पुर्जी जारी गरेर वायुसेवा सञ्चालन अनुमति (एओसी) नै खारेज गरिने बताउनुभयो ।
जहाजको बेस व्यवस्थापन निर्देशनविरुद्ध वायुसेवा सञ्चालकहरुले आन्दोलन गर्ने चेतावनी दिएका थिए । आइतबार संस्कृति पर्यटन तथा नागरिक उड्डयन मन्त्रालयले वायुसेवाको जहाँबाट पहिलो उडानको बेस छ त्यहिबाट नै पहिलो उडान भर्नु पर्ने तथा नाइट स्पटका लागि त्यहि बास बस्नु पर्ने निर्णय गरेको थियो । त्यसैको विरोधमा वायुसेवा सञ्चालकहरु आन्दोलित भएका थिए ।
प्राधिकरणमा मंगलवारराति बसेको बैठकमा वायुसेवा सञ्चालक संघले सबै उडान सञ्चालन गर्ने सहमति जनाएका हुन् ।
अत्यावश्यक सेवा सञ्चालन ऐन, २०१४ दफा (३) को उपदफा (१) अनुसार सरकारले ०७९ जेठ २६ गते राजपत्रमा सूचना प्रकाशित गरी हवाई सेवालाई अत्यावश्यक सेवामा समावेश गरेर हडताल गर्न निषेध गरेको छ ।
-1723260540.jpeg)
-1722510781.jpg)
